Meri Kismat

Vidhata ne mujh ko banaaya tha jis din

Dharti pe bhuchaal aaya tha us din

Mujhe dekh suraj ko gash aa gaya tha

Mere roop se chand chakara gaya tha

Tareef apni karoon ya khuda ki

Taqdir ke lekh likhne the baaki

Likha usne yeh koi leader banega

Waqalat karega, pleader banega

Banega kisi jeen ghodon ka maalik

Hazaron ka laakhon, karodon ka maalik

Ye duniya mein hal-chal machaata rahega

Sadaa muft ka maal khata rahega

Sabhi vaar hain iske hak mein hi aksar

Mangal, Brihaspat, Shukar, Shanichar

Padha lekh maine vidhata ka likha

Shanichar ki "ni" ko galat usne likha

Mein bola likha aapne "ni" galat hai

Shanichar mein likhna badi "e" galat hai

Wo bola ki tu kyon tarak kar raha hai

Badi choti "e" mein farak kar raha hai

Abhi to tu paida hua bhi nahin hai

Tujhe kya pata, kya galat, kya sahi hai

Abhi se agar itni himmat hai teri

Tu likhne mein galti pakadta hai meri

Karega na jaane tu kya janm paa kar

Meri pol kholega, duniya mein jaa kar

Wo sab mere doshon ko gun maante hain

Wo sab meri taakat ko pehchante hain

Main samarth hoon, jo karun wo sahi hai

Mujhe rok de, aisa koi nahin hai.

Tu pehla hi hai aur hai akhiri bhi

Jisne vidhata ki galti sahi ki

Jo tu chahta hai wahi kar raha hoon

Badi "e" ki galti, sahi kar raha hoon

Ise theek likhta hoon phir tere sar par

Shanichar, Shanichar, Shanichar, Shanichar

Diya usne yoon shaap gusse mein aa kar

Nahi chain payega duniya mein jaa kar

janam le kar yoon hi vicharta rahega

Sada galtiyaan theek karta rahega

Fatehaal hoga, fatichar rahega

Umra bhar tu hindi ka teacher rahega